नेकपाद्वारा १० बुँदे कार्ययोजना प्रस्ताव

काठमाडौ । नेपाली कम्युनिस्ट पार्टी (नेकपा)ले फागुन २१ गते सम्पन्न प्रतिनिधि सभा निर्वाचनको समीक्षा गर्दै आगामी यात्राका लागि १० बुँदे ठोस कार्ययोजना अघि सारेको छ ।

 बिहीबार पार्टी केन्द्रीय कार्यालय पेरिसडाँडामा बसेको केन्द्रीय संयोजन समितिको पहिलो बैठकमा संयोजक प्रचण्डले निर्वाचनको सामान्य समीक्षासहितको प्रतिवेदन र आगामी कार्यदिशा पेस गरेका हुन् ।

प्रतिवेदनमा निर्वाचनको परिणाम पार्टीले अनुमान गरेभन्दा फरक र 'असामान्य' आएको निष्कर्ष निकालिएको छ । प्रतिवेदनमा हारका आन्तरिक र बाह्य कारणहरूको विश्लेषण गर्दै पार्टीलाई नयाँ ढङ्गले पुनर्गठन गर्नुपर्ने आवश्यकता औँल्याइएको छ ।

डिजिटल सुनामी र संगठनात्मक कमजोरी मुख्य चुनौती
पार्टीले निर्वाचनमा अपेक्षाकृत नतिजा नआउनुमा 'डिजिटल सुनामी' लाई एक प्रमुख बाह्य कारण मानेको छ । 

सामाजिक सञ्जालको प्रयोगमार्फत परम्परागत शक्तिहरू विरुद्ध फैलाइएको 'प्रोपागान्डा' र नयाँ शक्तिहरूको 'लोकप्रियतावादी' लहरलाई चिर्न नसक्नु पार्टीको कमजोरी रहेको समीक्षामा उल्लेख छ । यस्तै, पार्टी एकता पछिको साङ्गठनिक समायोजन तल्लो तहसम्म हुन नसक्नु, वैचारिक कामको अभाव, र युवा पुस्तालाई आकर्षण गर्न नसक्नुलाई आन्तरिक कमजोरीका रूपमा लिइएको छ ।

यस्तो छ नेकपाको १० बुँदे कार्ययोजना
प्रतिवेदनमा पार्टीलाई पुनर्जीवन दिन १० बुँदे कार्ययोजना प्रस्ताव गरिएको छ-
१. सङ्गठन समायोजन र निर्माण: एक महिनाभित्र पालिका तहसम्म र तीन महिनाभित्र सबै वडामा सङ्गठन निर्माण र समायोजन सम्पन्न गर्ने ।
२. सदस्यता नवीकरण र अधिवेशन: तीन महिनाभित्र सदस्यता नवीकरण सक्ने र पाँच महिनाभित्र वडादेखि प्रदेशसम्मका अधिवेशनहरू सम्पन्न गर्ने ।
३. एकता महाधिवेशन: आगामी छ महिनाभित्र पार्टीको राष्ट्रिय एकता महाधिवेशन आयोजना गर्ने ।
४. नेतृत्वको पुनर्गठन र रूपान्तरण: सङ्गठनको मात्र नभई नेतृत्वको समेत पुनर्गठन गरी नयाँ र ऊर्जावान् बनाउने ।
५. प्रशिक्षण अभियान: व्यवस्थित पाठ्यक्रम निर्माण गरी देशव्यापी रूपमा सघन सैद्धान्तिक तथा वैचारिक प्रशिक्षण चलाउने ।
६. आर्थिक कोष निर्माण: पार्टीलाई आत्मनिर्भर बनाउन व्यवस्थित आर्थिक कोष निर्माण अभियान सञ्चालन गर्ने ।
७. प्रभावकारी प्रतिपक्षको भूमिका: संसद्मा राष्ट्र र जनसरोकारका विषयमा रचनात्मक र प्रभावकारी प्रतिपक्षको भूमिका निर्वाह गर्ने ।
८. स्थानीय तह परिचालन: पार्टीका निर्वाचित प्रतिनिधिहरूलाई जनपक्षीय काममा थप सक्रिय बनाउने ।
९. प्राविधिक क्षमता विकास: सूचना प्रविधिको युगसँग जुध्न नेता तथा कार्यकर्ताको प्राविधिक ज्ञान र क्षमता अभिवृद्धि गर्ने ।
१०. कार्यशैली र आचरण सुधार: नेता-कार्यकर्ताको कार्यशैली, जीवनशैली र आचरणमा आमूल सुधार ल्याउने ।

चैत २३ देखि निरन्तर छलफल हुने
बैठकमा पेस गरिएको उक्त प्रतिवेदन अध्ययनका लागि समिति सदस्यहरूलाई वितरण गरिएको छ । पार्टी स्रोतका अनुसार यस प्रतिवेदनमाथि आगामी चैत २३ गतेदेखि निरन्तर छलफल हुनेछ ।