उज्यालो नेपाल पार्टीद्वारा चुनावी प्रतिबद्धता पत्र सार्वजनिक

काठमाडौँ । आगामी प्रतिनिधि सभा निर्वाचनलाई लक्षित गर्दै उज्यालो नेपाल पार्टीले आफ्नो चुनावी प्रतिबद्धता पत्रको मुख्य अंश सार्वजनिक गरेको छ । 

आइतबार राजधानीमा आयोजित पत्रकार सम्मेलनमार्फत पार्टीले आर्थिक, रोजगारी तथा सामाजिक सुरक्षासम्बन्धी प्राथमिकता समेटिएको सार प्रस्तुत गरेको जनाएको छ ।

सार्वजनिक विवरणअनुसार पार्टीले वार्षिक नौ लाख रोजगारी सिर्जना गर्ने लक्ष्य निर्धारण गरेको छ । त्यस्तै राष्ट्रिय अर्थतन्त्र विस्तारतर्फ सन् २०३० सम्म कुल गार्हस्थ्य उत्पादन (जिडिपी) करिब ७० अर्ब अमेरिकी डलर र सन् २०३५ सम्म झण्डै १११ अर्ब अमेरिकी डलरसम्म पुर्‍याउने उद्देश्य उल्लेख गरिएको छ ।

आयस्तर वृद्धितर्फ सन् २०३५ सम्म प्रतिव्यक्ति आय करिब चार हजार अमेरिकी डलरसम्म पुर्‍याउने प्रतिबद्धता पनि जनाइएको छ । खेल क्षेत्रको प्रोत्साहनका लागि पदक विजेता राष्ट्रिय खेलाडीलाई मासिक २५ हजार रुपैयाँ तथा अन्तर्राष्ट्रियस्तरमा पदक हासिल गर्ने खेलाडीलाई मासिक ६० हजार रुपैयाँ पेन्सन उपलब्ध गराउने योजना समेत समेटिएको पार्टीले जनाएको छ ।