‘राष्ट्रिय सभामा काँग्रेससँग मिलेर हामीलाई आउट गरेपछि एमालेसँग कुरा मिलेन’ : प्रचण्ड

काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले आफू चुनाव जित्नकै लागि रुकुम पूर्व नगएको जिकिर गरेका छन् । सिन्धुली पुगेका संयोजक प्रचण्डले सिन्धुली, महोत्तरी, नुवाकोटबाट लडेको भएपनि आफूले सहजै चुनाव जित्ने आधार बनेको उनले बताए ।

राष्ट्रियसभा चुनावमा काँग्रेससँग मिलेर आफूहरूलाई आउट गरेपछि प्रतिनिधि सभामा पनि गठबन्धन गर्ने गरी एमालेबाट आएको प्रस्तावको कुरा नमिलेको उनले बताए।

‘राष्ट्रिय सभाका सदस्यको निर्वाचन हुनु अगाडि कुरा हो। यो प्रस्ताव हाम्रो थिएन फेरि, काँग्रेस र एमालेबाट केही शीर्ष नेताहरूको हकमा हामीले उनीहरूलाई चुनाव जिताउने ढंगले केही सिट एडजस्ट गर्नुपर्छ भन्ने उनीहरूको थियो। हामीले त्यसमा सैद्धान्तिक रूपले अस्वीकार पनि हामीले गरेका थिएनौँ, स्वीकार गरेका पनि थिएनौँ,’ उनले भने ,‘नेपाली कम्युनिस्टलाई आउट गर्ने बाटो पक्रिनुभयो उहाँहरूले।’

उनले राष्ट्रियसभामै प्रयास विफल भएपछि प्रतिनिधिसभाको हकमा अघि बढ्न नसकेको बताए।