निर्वाचनलाई शान्तिपूर्ण, मर्यादित र निष्पक्ष बनाउन पाँच राजनीतिक दलहरूको साझा प्रतिबद्धता

काठमाडौँ । आगामी फागुन २१ गते सम्पन्न हुने प्रतिनिधि सभा सदस्य निर्वाचनलाई स्वच्छ, सुरक्षित र निष्पक्ष वातावरणमा सम्पन्न गराउने उद्देश्यसहित धादिङ जिल्लाका प्रमुख राजनीतिक दलहरूले संयुक्त सहमति जनाएका छन्। निर्वाचन प्रक्रियामा शान्ति र मर्यादा कायम राख्ने विषयमा दलहरूबीच साझा दृष्टिकोण बनेको हो।

धादिङबेसीमा मंगलबार बिहान सम्पन्न छलफलमा नेपाली काँग्रेस, नेकपा (एमाले), नेपाली कम्युनिस्ट पार्टी, राष्ट्रिय स्वतन्त्र पार्टी र राष्ट्रिय प्रजातन्त्र पार्टीका जिल्ला तहका नेतृत्व तथा दुवै निर्वाचन क्षेत्रका उम्मेदवारहरूको सहभागिता रहेको थियो। छलफलपछि दलहरूले निर्वाचनलाई विवादरहित र जिम्मेवार ढंगले अघि बढाउने प्रतिबद्धता सार्वजनिक गरेका छन्।

सहमतिको लिखित दस्तावेजमार्फत दलहरूले जिल्लामा सामाजिक सद्भाव, राजनीतिक स्थिरता र आपसी विश्वास कायम गर्दै दीर्घकालीन विकास, सुशासन र समावेशी समाज निर्माणका लागि सहकार्य गर्ने उल्लेख गरेका छन्। निर्वाचन परिणाम जेसुकै भए पनि जिल्लाको साझा हितका विषयमा मिलेर काम गर्ने सहमति समेत जनाइएको छ।