सोविता गौतमले निर्वाचन आयोगमा किन गरिन् झुठ्ठो विवरण पेश ?

प्रतिनिधि सभा सदस्य उम्मेदवार बनेकी सोविता गौतमले निर्वाचन आयोगमा झुठ्ठो विवरण पेश गरेको खुलेको छ । आफूले अध्ययन नै नगरेको शैक्षिक योग्यता उल्लेख गरेर आयोगलाई झुक्याइएको तथ्य फेला परेको छ ।

आउँदो फागुन २१ गतेको प्रतिनिधि सभा सदस्य निर्वाचनका लागि राष्ट्रिय स्वतन्त्र पार्टी (रास्वपा) ले चितवन क्षेत्र नम्बर ३ बाट सोविता गौतमलाई उठाएको छ । उनी २०७९ को निर्वाचनमा काठमाडौं क्षेत्र नम्बर २ बाट निर्वाचित भएकी थिइन् । 

चितवनको भरतपुर महानगरपालिकाका एक वासिन्दासङ्ग पोहोर बिहे गरेकी उनी पेशाले कानुन व्यवसायी हुन् । दोस्रोपटक चुनावी मैदानमा उत्रिएकी उनले आफूले पुरा गर्दै नगरेको शैक्षिक योग्यता राखेर उम्मेदवारी फाराम भरेको पाइएको छ । आयोगले हिजो निकालेको उम्मेदवारको वैयक्तिक विवरणमा केही कुरा ढाँटेको प्रष्ट देखिन्छ । 

जसमा शैक्षिक योग्यता कानुनमा स्नातकोत्तर उल्लेख छ । जबकि,उनले स्नातकोत्तर उत्तीर्ण गरेकी छैनन् । उनले हालै एलएलएम पहिलो सेमेस्टरको परीक्षासम्म दिएकी छन् । प्रोफेसर डाक्टर युवराज सङ्ग्रौलाको काठमाडौं स्कूल अफ लमा अध्ययनरत उनी नियमित कलेज पनि नजाने स्रोत बताउँछ ।