रास्वपा र कुलमान पक्षबीचको एकता भंग, छुट्टाछुट्टै चुनावमा जाने

 काठमाडौं । राष्ट्रिय स्वतन्त्र पार्टी (रास्वपा) र कुलमान घिसिङ संरक्षक रहेको उज्यालो नेपाल पार्टीबीच एकता सहमति भंग भएको छ । रास्वपाका नेता शिशिर खनालले यसअघि दुई पक्षबीच गरिएको सहमति भंग भएको जानकारी दिए ।

“उज्यालो नेपालसँग यसअघि भएको एकता भंग भएको छ । अब रास्वपा छुट्टै अगाडि बढ्छ,” उनले भने । 

पार्टी, पद सबै त्याग्दा पनि रास्वपाले ‘पेल्न’ थालेपछि दुई पक्षबीचको वार्ता नकारात्मक बन्दै गएको उज्यालो नेपालका एक नेताले बताए ।

“पार्टी, पद सबै त्याग्न तयार हुँदा पनि रास्वपाले पेलिरह्यो । समानुपातिकमा तलको तलै पार्नुभयो । समानुपातिक बन्दसूची सच्यायौँ भन्ने तर नपर्ने गरी ४ को ५, ५ को ६ मा झार्ने काम मात्रै भयो,” ती नेताले भने, “केन्द्रीय सदस्यमा पनि सुरुमा २१ जना आउनू भनियो । तर, अहिले १२ जना मात्रै ल्याउनू रे !”

ती नेताले अगाडि भने, “उज्यालो नेपालले मन्त्री, प्रधानमन्त्री सबै छोड्यो । महामन्त्री नभएर सहमहामन्त्री दिइयो, त्यो पनि ठिकै छ भन्यौँ । तर, कुनै पनि दृष्टिकोणबाट उज्यालो नेपाललाई समेट्न खोजिएन ।”

कुलमान पक्षले रास्वपामा वरिष्ठ उपसभापतिसँगै पार्टीको नाम परिवर्तन गर्नुपर्ने विषय आउँदो महाधिवेशनमा लैजानुपर्ने प्रस्ताव गरेको थियो । तर, रास्वपा पक्ष यो विषय मान्न तयार नभएको ती नेताले बताए ।