सीडीओहरूलाई गृह मन्त्रालयको १० बुँदे सर्कुलर

काठमाडौँ । धनुषा र वीरगञ्जमा हिन्दु र मुस्लिम समुदायको बिचमा विवाद भएपछि गृह मन्त्रालयले धार्मिक सहिष्णुता कायम राख्न भन्दै प्रमुख जिल्ला अधिकारी (सीडीओ) हरूलाई सर्कुलर जारी गरेको छ । 

७७ वटै जिल्लाका सीडीओहरुलाई मंगलबार १० बुँदे सर्कुलर जारी गरिएको गृहमन्त्री ओमप्रकाश अर्यालको सचिवालयले जनाएको छ ।

गृह मन्त्रालयकी उपसचिव रमा आचार्य सुवेदीद्वारा जारी निर्देशनात्मक सर्कुलरमा सीडीओहरुलाई गैरकानुनी क्रियाकलापमा संलग्न जोसुकैलाई अविलम्ब कानुनी दायरामा ल्याउन भनिएको छ ।

धार्मिक, सामाजिक एवं सांस्कृतिक सद्भाव र सहिष्णुता प्रवर्द्धन गर्न सरोकारवालासहितको समन्वय बैठक गर्न भनिएको छ । समन्वयका लागी जिल्ला स्थित राजनीतिक दलका प्रमुखहरू, सामाजिक, सांस्कृतिक एवम् धार्मिक क्षेत्रका अगुवाहरूलाई सद्भावका लागि सार्वजनिक आव्हान गर्न निर्देशन गरिएको छ । 

सद्भाव र्‍याली आयोजना गरी गर्न र सीमा क्षेत्रमा कडा चेकजाँच गर्न मन्त्रालयले निर्देशन जारी गरेको छ ।स्थानीय सञ्चार माध्यमबाट स्थानीय भाषामा सामाजिक सद्भाव बढाउने खालका कार्यक्रम सञ्चालन गर्ने व्यवस्था मिलाउन सीडीओहरुलाई भनिएको छ ।

प्रमुख जिल्ला अधिकारीको संयोजकत्वमा सात–सदस्सीय जिल्ला शान्ति तथा सामाजिक सद्भाव समिति गठन गर्न भनिएको छ ।

यस्तै, विगतका वर्षहरूमा घटनाहरूको अभिलेखको आधारमा विवाद हुन सक्ने सम्भावित कार्यक्रम वा पर्वहरूको सूची तयार गरी वार्षिक क्यालेन्डर तयार गर्ने गर्न पनि सर्कुलर गरिएको गृहमन्त्रीको सचिवालयले जनाएको छ ।