त्रिभुवन विश्वविद्यालयमा स्नातकोत्तर तहको भर्ना खुल्यो

काठमाडौ । त्रिभुवन विश्वविद्यालय (त्रिवि) ले शैक्षिक वर्ष २०८२/०८३ का लागि स्नातकोत्तर तह (मास्टर्स) प्रथम सेमेष्टरमा नयाँ विद्यार्थी भर्ना आह्वान गरेको छ । विश्वविद्यालयको शिक्षाध्यक्षको कार्यालयले एक सूचना जारी गर्दै भर्ना तालिका सार्वजनिक गरेको हो ।

सार्वजनिक सूचना अनुसार त्रिविका मानविकी, व्यवस्थापन, शिक्षाशास्त्र, कानुन संकाय तथा वन विज्ञान, कृषि र पशु विज्ञान, इन्जिनियरिङ्ग र विज्ञान तथा प्रविधि अध्ययन संस्थान अन्तर्गतका क्याम्पसहरूमा भर्ना प्रक्रिया सुरु हुनेछ ।

विद्यार्थीहरूले २०८२ मंसीर ११ गतेदेखि पौष ११ गतेसम्म आवेदन फाराम बुझाउन सक्नेछन् । विश्वविद्यालयले २०८२ माघ महिनादेखि कक्षा सञ्चालन गर्ने तयारी गरेको छ ।

विद्यार्थीले प्रवेश गर्न चाहेको प्रत्येक संकाय, अध्ययन संस्थान वा विषय अनुसार क्याम्पसमा छुट्टाछुट्टै आवेदन फाराम बुझाउनुपर्नेछ । आवेदन दिँदा हालसालै खिचेको फोटो, ट्रान्सक्रिप्ट र चारित्रिक प्रमाणपत्रको प्रमाणित प्रतिलिपि अनिवार्य रूपमा पेश गर्नुपर्ने कार्यालयले जनाएको छ ।

प्रवेश परीक्षा तथा भर्ना सम्बन्धी अन्य विस्तृत जानकारी भने सम्बन्धित डीन कार्यालयहरूले निर्धारण गरे बमोजिम हुनेछ । यसअघि व्यवस्थापन र शिक्षाशास्त्र संकायबाट प्रकाशित भर्ना सूचना पनि यही शैक्षिक क्यालेन्डर अनुसार भएको शिक्षाध्यक्षको कार्यालयले स्पष्ट पारेको छ ।