गृहमन्त्रीले गरे आईजीपी खापुङको बिदाइ

काठमाडौँ । गृहमन्त्री ओमप्रकाश अर्यालले प्रहरी महानिरीक्षक चन्द्र कुवेर खापुङको बिदाइ गरेका छन् । बुधवार मन्त्रालयमा आयोजित कार्यक्रममा अर्यालले उनलाई बिदाइ गरेका हुन् ।

३० वर्षे सेवा अवधि पुरा गरेर खापुङ आजबाट अवकाशमा जाँदै छन् । प्रहरी प्रधान कार्यालयले बुधवार साँझ उनको बिदाइ कार्यक्रम आयोजना गरेको छ ।

भदौ १९ बाट प्रहरीको कमाण्ड समालेका खापुङले आईजीपी भएको पाँचौँ दिनमा नै जेनजी प्रदर्शनको मार खेपेका थिए । 

आईजीपी नियुक्त भएको पाँचौँ दिनमा काठमाडौँको बानेश्वर र इटहरीमा प्रहरीको गोलीबाट किशोरहरूको मृत्यु भयो । उनी आईजीपी भएको छैटौँ दिनमा मुलुकको कार्यकारी प्रधानमन्त्री हेलिकप्टर चढेर बालुवाटार छाड्न बाध्य भए ।