फागुन २० गतेसम्म १८ वर्ष पूरा हुने नागरिकले भोट हाल्न पाउने

काठमाडौँ । निर्वाचन आयोगले आउँदो कात्तिक मसान्त (कात्तिक ३०) सम्म मतदाता नामावली संकलन र अद्यावधिक गर्ने निर्णय गरेको छ । 

बिहीबार बसेको बैठकले कात्तिक मसान्तसम्म मतदाता नामावली संकलन गर्ने निर्णय गरेका हुन् । कात्तिक मसान्तसम्म आगामी २० फागुनसम्म १८ वर्ष पूरा हुने नागरिकले भोट हाल्न पाउने गरी नामावली संकलन र अद्यावधिक गरिने आयोगले जनाएको छ । 

जेन जेड विद्रोहपश्चात् सुशीला कार्की नेतृत्वको अन्तरिम सरकारले २१ फागुनका लागि निर्वाचन घोषणा गरेको छ । निर्वाचन घोषणापछि मतदाता नामावली संकलन रोकिने व्यवस्था रहे पनि सरकारले अध्यादेशमार्फत उक्त व्यवस्थालाई परिमार्जन गरेसँगै नयाँ निर्णय गर्दै मतदाता नामावली संकलन र अद्यावधिक गर्ने निर्णय गरेको हो ।