उत्तर कोरियाद्वारा दुई हवाई प्रतिरोधी क्षेप्यास्त्र परीक्षण

सियोल । उत्तर कोरियाली सर्वोच्च नेता किम जोङ उनले दुई नयाँ हवाई प्रतिरोधी क्षेप्यास्त्र परीक्षणको निरीक्षण गरेको आइतबार राज्य सञ्चालित सञ्चार माध्यमले जनाएको छ । उत्तर कोरियाले दक्षिणमाथि सीमामा तनाव बढाएको आरोप लगाएपछि उत्तर कोरियाले यस्तो परीक्षण गरेको हो ।

शनिबार गरिएको परीक्षणले दुई ‘सुधारिएको’ मिसाइल प्रणालीसँग ‘उत्कृष्ट युद्ध क्षमता’ रहेको देखाएको उत्तर कोरियाको कोरियन सेन्ट्रल न्युज एजेन्सी (केसीएनए) ले जनाएको छ ।

केसीएनएले नयाँ मिसाइलहरूको विस्तृत विवरण भने दिएको छैन । उसले केबल तिनीहरूको ‘अपरेसन र प्रतिक्रिया मोड अद्वितीय र विशेष प्रविधिमा आधारित छ’ भन्ने उल्लेख गरेको छ । परीक्षण कहाँ गरिएको थियो भन्ने कुरा पनि सार्वजनिक गरिएको छैन ।

“दुई प्रकारका प्रोजेक्टाइलका प्राविधिक विशेषताहरू विभिन्न हवाई लक्ष्यहरू नष्ट गर्न निकै उपयुक्त छन् भन्ने कुरा गोलाबारीमार्फत स्पष्ट प्रमाणित भएको छ”, केसीएनएले भन्यो ।

केसीएनएले जारी गरेका तस्बिरहरूमा हवाई रक्षा मिसाइलहरू आकाशमा उडिरहेको र आइरहेको प्रक्षेप्यास्त्रलाई अवरोध गरेको दृश्य देखाइएको छ ।

किमलाई आफ्नो डेस्कमा बसिरहेको, छेउमा राखिएको दूरबिन नजिकै, एक सैन्य अधिकारीबाट जानकारी लिइरहेको तस्वीरमा चित्रित गरिएको छ ।

उत्तर कोरियाली नेताले प्रमुख पार्टी बैठकअघि रक्षा विज्ञान क्षेत्रमा एउटा ‘महत्त्वपूर्ण कार्य’ पूरा गर्न निर्देशन दिएको बताइएको छ ।

दक्षिण कोरियाली सेनाले शनिबार दुई हप्ताअघि भएको घटनाबारे जनाउँदै सीमामा केही समयका लागि प्रवेश गरेका उत्तर कोरियाली सैनिकलाई चेतावनी स्वरूप गोली प्रहार गरेको जनाएको छ ।

राष्ट्रसङ्घीय कमान्डले मङ्गलबार सीमापार गर्ने उत्तर कोरियाली सैनिकको सङ्ख्या ३० रहेको जानकारी दिएको योन्हाप समाचार एजेन्सीले आइतबार जनाएको छ ।

प्योङयाङको राज्य मिडियाले सेनाका लेफ्टिनेन्ट जनरल को जोङ चोललाई उद्धृत गर्दै उक्त घटना ‘पूर्वनियोजित र जानाजानी गरिएको उक्साहट’ भएको बताएको छ ।

“यो निकै गम्भीर प्रस्तावना हो, जसले अनिवार्य रूपमा दक्षिणी सीमा क्षेत्रमा ठूलो सङ्ख्यामा सैनिकहरूबीच टकरावलाई अनियन्त्रित चरणमा लैजान सक्छ”, कोले भन्नुभयो ।