'अरू पार्टीमाथि प्रहार गर्नुभन्दा आफ्नो पार्टी सम्हाल्न उचित हुन्छ'

काठमाडौँ । नेपाली कांग्रेसकी सांसद ईश्वरीदेवी न्यौपानेले राष्ट्रिय स्वतन्त्र पार्टी (रास्वपा)का सांसदहरूलाई अरू पार्टीमाथि प्रहार गर्नुभन्दा आफ्नो पार्टी सम्हाल्न उचित हुने बताएकी छन् । 

प्रतिनिधिसभाको बिहीबारको बैठकमा बोल्दै न्यौपानेले भनिन्, ‘सांसदको हस्ताक्षरको विषय हिजो निकै चर्चामा रह्यो । यही विषयमा सदनमा बोल्दा केहि सांसदले संसदीय भाषा र पदीय मर्यादा समेत बिर्सनु भयो ।मेरो सुझाव छ अरू पार्टी प्रति प्रहार गर्नुभन्दा  आफ्नै पार्टीको भाँडभैलो सम्हाल्दा बढी उचित होला ।’ 

सदनमा अल्पमत र बहुमत कै खेल हुने र त्यसको लागि गर्ने हस्ताक्षर नै भएको न्यौपानेले बताइन् । ‘बहुमत पुग्ने बित्तिकै के अहिलेका प्रतिपक्ष नेता नाई म प्रधानमन्त्री बन्दैन भन्नुहुन्छ तर बोक्नेले काँध छोडेपछि स्वतः झर्नु पर्छ यो नियम हो यहाँको,’ न्यौपानेले भनिन् । 

उनले उपसभामुख हुन भन्दैमा इन्दिरा नारा मगरलाई ठगी गर्न छुट दिन नसक्ने बताइन् । ‘त्यो पार्टी र माननीय ज्युहरूलाई, विभिन्न देशमा सम्मानित व्यक्तित्व भनेर हिजो संसद्मा वकालत गर्नुभयो । संसद्कै पनि त सम्मानित बनाएका छौ तर सम्मानित भन्दैमा ठगी गर्ने छुट छ ? या त्यो पार्टीको भएपछि सबै कुरा माफ हुन्छ ? मानव तस्करलाई कारबाही गर भनेर कुर्लनु हुन्छ के यो प्रस्ट देखिने मानव तस्करी होइन ?’

उनले नेपालको जानकारी विना नेपालको  भूमि  प्रयोग गर्दै चिन र भारतले व्यापार गर्ने कुरा नेपालकै राष्ट्रियतामाथि प्रहार भएको भन्दै यो स्वीकार्य  नभएको बताइन् ।