गृहमन्त्री लेखकले काँग्रेसका दुई महामन्त्रीसँग गरे बेग्लै संवाद

काठमाडौँ । सरकारले ल्याएका कतिपय विधेयकमा पार्टीभित्र विमति बढिरहेका बेला गृहमन्त्री रमेश लेखकले काँग्रेसका दुई महामन्त्रीसँग बिहीबार साँझ बेग्लै संवाद गरेका छन् ।

होटेल मेरियटमा महामन्त्रीद्धय गगन थापा र विश्वप्रकाश शर्मासँग गृहमन्त्रीले लामो छलफल गरेका हुन् । छलफलका एजेण्डाबारे दुवै पक्षले सामान्य शिष्टाचार र अनौपचारिक भेट मात्र भनेका छन् ।

पार्टीभित्र संस्थापन पक्षका वरिष्ठ नेताहरूले बेग्लै छलफल चलाइरहेका बेला महामन्त्रीद्धयसँग गृहमन्त्री लेखकको भेट अर्थपूर्ण मानिएको छ । यद्यपि गृहमन्त्रीनिकट स्रोतले भने उक्त छलफललाई ‘डिनर मिटिङ’ भनेको छ ।

गृहमन्त्री र महामन्त्रीद्धयबीच मेरियटमा करिब तीन घण्टाको छलफलपछि राति साढे १० बजे बाहिरिएका थिए । सरकार सञ्चालन सम्बन्धी उच्चस्तरीय संयन्त्रमा रहेका महामन्त्री थापा पछिल्लो समय बालुवाटार बैठकमा जान छाडेका छन् ।

निजामती विधेयकमा भएको छेडखानी छानबिन गर्ने संसदीय विशेष समितिले राज्य व्यवस्था समितिका सभापति रामहरि खतिवडालाई नैतिक र राजनीतिकरुपमा जिम्मेवार ठहर गरेपछि काँग्रेस नेतृत्व दबाब छ ।

सभापति देउवाले महामन्त्रीद्धयसँग छलफल गर्नुअघि गृहमन्त्रीले उनीहरूसँग भेटेर समग्र विषयमा कुराकानी गरेको बताइएको छ ।