नाउपा संसदीय दलको नेतालाई रञ्जिताले सोधिन् स्पष्टीकरण

काठमाडौँ । नागरिक उन्मुक्ति पार्टीकी अध्यक्ष रञ्जिता श्रेष्ठले पार्टीको संसदीय दलका नेता गंगाराम चौधरीलाई विधान विपरीतको क्रियाकलाप गरेको भन्दै स्पष्टीकरण सोधेकी छन् ।

आफू बिरामी परेर उपचाररत रहेको अवस्थामा कुनै जानकारी नगराई कन गत ९ साउन र ११ साउनमा विभिन्न गैरकानूनी निर्णयहरू गरेको गंगाराममाथि रञ्जिताको आरोप छ ।

‘तपाईंलाई विधानको धारा १७ बमोजिम किन कारबाही नगर्ने, प्रस्तुत पत्र प्राप्त भएको मितिले २४ घण्टा भित्र आधार कारण युक्त एवं चित्तबुझ्दो स्पष्टीकरण पेश गर्नुहोला । अन्यथा पार्टीको विधान बमोजिम तपाईँलाई कारबाही हुने ब्यहोरा समेत जानकारी गराइन्छ,’ स्पष्टीकरणको पत्रमा भनिएको छ ।

रञ्जिताले पत्रको बोधार्थ निर्वाचन आयोगलाई पनि पठाएकी छन् ।