जुवातास खेलिरहेको अवस्थामा १६ जना पक्राउ

काठमाडौँ । प्रहरीले जुवातास खेलिरहेको अवस्थामा १६ जनालाई पक्राउ गरेको छ ।  काठमाडौँ र कास्कीबाट १६ जना पक्राउ परेका हुन् । काठमाडौँको बुढानीलकण्ठ नगरपालिका–१ सिमलीगाउँ बस्ने रामेछाप मन्थली नगरपालिका–६ घर भएका ३९ वर्षीय श्याम तामाङको टहरामा जुवातास खेलिरहेको अवस्थामा तामाङ समेत ७ जनालाई शनिबार दिउँसो प्रहरीले पक्राउ गरेको छ । प्रहरी  प्रभाग बुढानीलकण्ठबाट खटिएको प्रहरीले उनीहरूलाई नगद ५० हजार ३ सय ३० रुपैयाँ सहित पक्राउ गरेको हो ।

त्यस्तै कास्कीको पोखरा महानगरपालिका–६ लेकसाइडस्थित होटल लेक टप एन्ड रेस्टुरेन्टमा जुवातास खेलिरहेका अवस्थामा रेस्टुरेन्टका सञ्चालक पोखरा महानगरपालिका–२४ घर भएका ४७ वर्षीय चिन्तामणि अधिकारी समेत ९ जनालाई शनिबार साँझ प्रहरीले पक्राउ गरेको छ । 

जिल्ला प्रहरी कार्यालय कास्कीबाट खटिएको प्रहरीले उनीहरूलाई नगद २ लाख ६१ हजार ४ सय नेपाली रुपैयाँ, ५ हजार ५ सय भारतीय रुपैयाँ र २० बुक तास सहित पक्राउ गरेको हो । दुवै घटनाका सम्बन्धमा प्रहरीले आवश्यक अनुसन्धान भइरहेको जानकारी दिएको छ ।