युक्रेनको राजधानी किभमा रुसको भीषण आक्रमण

एजेन्सी । रुसले युक्रेनको राजधानी किभमा ठूलो हवाई आक्रमण सुरु गरेको छ ।
 
सोमबार बेलायत र जर्मनीले युक्रेनलाई हतियार प्रदान गर्न नेटो सहयोगीहरूका लागि अमेरिकी राष्ट्रपति डोनाल्ड ट्रम्पको योजनाबारे छलफल गर्न बैठक हुनुभन्दा केही घण्टाअघि रुसले आक्रमण गरेको समाचार संस्था एपीले जनाएको छ ।

यो आक्रमण हालैका महिनाहरूमा युक्रेनमाथि गरेको सबैभन्दा ठूलो हवाई आक्रमणहरूमध्ये एक भएको बताइएको छ ।

युक्रेनको राजधानी किभमा भएको ड्रोन र मिसाइल आक्रमणमा दुईजनाको मृत्यु भएको छ । १२ वर्षीय एक बालकसहित १५ जना घाइते भएको युक्रेनका राष्ट्रपति भोलोदिमिर जेलेन्स्कीले बताएका छन् ।

मानिसहरूले आश्रय लिएको किभको शेभचेन्किभ्स्की जिल्लामा रहेको एक सबस्टेशनको प्रवेशद्वारमा ड्रोनले आक्रमण गरेको देखिएको छ । 

सामाजिक सञ्जालमा पोस्ट गरिएका भिडियोहरूले उक्त स्टेशनको प्लेटफर्म धुवाँले ढाकिएको र भित्र दर्जनौँ मानिसहरू रहेको देखाएको छ । 

सबैभन्दा ठूलो आक्रमणले सहरको डार्निट्स्की जिल्ला प्रभावित भएको छ । त्यहाँ एक किन्डरगार्डेन, सुपरमार्केट र गोदाम सुविधाहरूमा आगलागी भएको छ ।

ट्रम्पले केही दिनभित्रै युक्रेनमा हतियार आपूर्ति हुने बताएको एक हप्तापछि रुसका तर्फबाट भएका घातक आक्रमणले युक्रेनलाई थप पश्चिमी सैन्य सहायता आवश्यक रहेको देखिएको छ । विशेषगरी हवाई रक्षामा आवश्यकताको रहेको विश्लेषण गरिएको एपीले जनाएको छ ।

सोमबार जेलेन्स्कीसँग वार्ताका लागि कीभ पुगेका फ्रान्सेली विदेशमन्त्री जीन–नोएल बारोटले क्षतिग्रस्त क्षेत्रको भ्रमण गरेका थिए ।

जेलेन्स्की र बारोटले रक्षा सहकार्य विस्तार गर्ने, फ्रान्सेली कम्पनीहरूले युक्रेनमा ड्रोन उत्पादन सुरु गर्ने निर्णय र युक्रेनको युरोपेली संघ सदस्यतातर्फको बाटोलाई अगाडि बढाउने विषयमा कुराकानी गरेको युक्रेनी नेताले बताएका छन् ।