नेपालीलाई एकताबद्ध गर्न संस्कृति एवं कलाको महत्त्वपूर्ण भूमिका छ: सभामुख घिमिरे

काठमाडौँ । सभामुख देवराज घिमिरेले संसारभर छरिएर रहेका नेपालीलाई एकताबद्ध गर्न संस्कृति एवं कलाको महत्त्वपूर्ण भूमिका रहेको बताएका छन् । आइतबार ‘मेरो भ्वाइस युनिभर्स’ र ‘मेरो डान्स युनिभर्स’ मा विभिन्न देशबाट नेपाल आएका कलाकारहरूसँग संसद् भवनमा भेट्दै सभामुख घिमिरेले यस्तो बताएका हुन् ।

साथै, उनले भुटानबाट ठूलो संख्यामा नेपालीहरू लखेटिनुपरेको विषय पनि सो क्रममा सुनाए । ‘पञ्चायत व्यवस्थालाई अन्त्य गरेर बहुदलीय व्यवस्था आएको थियो, त्यहीबेला भुटानबाट ठूलो संख्यामा नेपाली मूलका धेरै नागरिकहरू लखेटिनुभयो । उनीहरूलाई नेपाली जनताले फूलमाला लगाएर स्वागत गरेका थिए,’ सभामुख घिमिरेले भने, ‘फकिर्ने कोशिस गर्दा पनि भारत सरकारले बाटोमा सुरक्षा निकायहरू राखेर जान दिएन । हामी नेपाली र नेपाली मूलको भएको कारणले भुटान पुगे पनि पाँच पुस्तापछि नेपाली नागरिकलाई लखेट्ने काम गर्‍यो ।’

उक्त भेटघाट कार्यक्रममा सभामुख घिमिरेले विगतमा नेपालीहरूले भोग्नुपरेको निरंकुश शासन, अभाव र उत्पीडनको चर्चा गर्दै अहिलेका यस्ता सांस्कृतिक कार्यक्रममा नेपालीपनको जगेर्ना हुँदै आएको उल्लेख गरे ।

‘विश्वका विभिन्न देशमा रहनु भएका नेपाली भाषीहरूलाई एक ठाउँमा ल्याउने काम मेरो भ्वाइस युनिभर्स र मेरो डान्स युनिभर्सले गरेको छ । यसको अर्थ के हो भने हामी जुन मूलकबाट ओरिजिन भयौँ,’ सभामुख घिमिरेले भने, ‘त्यसको पहिचान हाम्रो संस्कार, हाम्रो भाषा र संस्कृति र साहित्यको संरक्षण गर्न सहयोग गर्छ । त्यसकारण सबैले मिलेर संसारभर रहनुभएका नेपालीहरूलाई गाँस्ने कुराको विकासमा आ-आफ्नो ठाउँबाट सहयोग गर्नुपर्छ ।’

उनले निरंकुश राजतन्त्रको कठोर घेराभित्र नेपाल थिचिएको कारण तत्कालीन समयमा नेपालमा कला र साहित्यसँग सम्बन्धित कार्यक्रमहरू आयोजना हुन नपाएको उल्लेख पनि गरेका छन् ।