संयुक्त राष्ट्रसंघकी विशेषज्ञमाथि अमेरिकाको प्रतिबन्ध

न्युयोर्क । संयुक्त राज्य अमेरिकाका राष्ट्रपति डोनाल्ड ट्रम्पको प्रशासनले संयुक्त राष्ट्रसंघकी विशेषज्ञ फ्रान्सेस्का अल्बानिजमाथि प्रतिबन्ध लगाएको छ। यो प्रतिबन्ध गाजामा इजरायलले प्यालेस्टाइनीहरूविरुद्ध गरेको दुर्व्यवहारको बारेमा उनको दस्तावेजीकरणको कारण लगाइएको हो।

अमेरिकी विदेशमन्त्री मार्को रुबियोले बुधबार कारबाहीको घोषणा गर्दै अल्बानिजमाथि ‘संयुक्त राज्य अमेरिका र इजरायलविरुद्ध राजनीतिक र आर्थिक युद्धको अभियान चलाएको’ आरोप लगाए।

कब्जा गरिएको प्यालेस्टिनी क्षेत्रका लागि संयुक्त राष्ट्रसंघकी विशेष प्रतिवेदकको रूपमा कार्यरत अल्बानिज, इजरायलको मानवअधिकार उल्लङ्घन अन्त्य गर्न कारबाहीको लागि आह्वान गर्ने एक प्रमुख विश्वव्यापी आवाज हुन्।

इजरायल र यसका समर्थकहरूले वर्षौँदेखि अल्बानिजको आलोचना गर्दै आएका छन् र उनलाई संयुक्त राष्ट्रसंघको पदबाट हटाउन माग गरिरहेका छन्। अल जजीराले सम्पर्क गर्दा, अल्बानिजले अमेरिकी प्रतिबन्धहरूलाई खासै महत्त्व नदिएको बताउँदै उनले आफ्नो काम जारी राख्नमा केन्द्रित रहेको बताइन्।

‘माफिया शैलीको धम्कीपूर्ण प्रविधिहरूमा कुनै टिप्पणी छैन,’ संयुक्त राष्ट्रसंघकी विशेषज्ञले एक टेक्स्ट सन्देशमा लेखिन्, ‘सदस्य राष्ट्रहरूलाई नरसंहार रोक्न र दण्डित गर्ने उनीहरूको दायित्व सम्झाउन व्यस्त छु।’

यसअघि, बुधबार उनले गाजामा युद्ध अपराधको आरोपमा अन्तर्राष्ट्रिय फौजदारी अदालत (आईसीसो) को खोजी सूचीमा रहेका इजरायली प्रधानमन्त्री बेन्जामिन नेतन्याहूलाई आफ्नो हवाई क्षेत्र प्रयोग गर्न दिएकोमा युरोपेली सरकारहरूलाई आलोचना गरेकी थिइन्।

‘इटालियन, फ्रेन्च र ग्रीक नागरिकहरूलाई थाहा हुनुपर्छ कि अन्तर्राष्ट्रिय कानुनी व्यवस्थाको उल्लङ्घन गर्ने हरेक राजनीतिक कार्यले उनीहरू सबैलाई कमजोर र खतरामा पार्छ। र हामी सबैलाई पनि,’ अल्बानिजले एक सामाजिक सञ्जाल पोस्टमा लेखिन्।

रुबियोले इजरायली अधिकारीहरूलाई आईसीसीमा मुद्दा चलाउन अल्बानिजको दबाबलाई प्रतिबन्धको कानुनी आधारको रूपमा उल्लेख गरे। यो प्रतिबन्धले अल्बानिजलाई अमेरिकामा यात्रा गर्न रोक्ने तथा अमेरिका रहेका उनको सम्पत्ति समेत जफत गर्ने हुनसक्ने बीबीसीले जनाएको छ ।