स्रोत नखुलेको रकमसहित तीनजना पक्राउ

पर्सा । पर्सा प्रहरीले स्रोत नखुलेको २८ लाख २८ हजार हुण्डीको रकमसहित तीन जनालाई पक्राउ गरेको छ ।

पर्सा प्रहरीका प्रवक्ता किशोर लम्सालका अनुसार हुण्डी कारोबारमा संलग्न रहेको आशङ्कामा पकाहामैनपुर गाउँपालिका– २ का अनिल वर्णवालाई ९ लाख ४७ हजारसहित र वीरगञ्ज महानगर– ३ आदर्शनगरका विनितकुमार श्रीवास्तवलाई १५ लाख ८१ हजार रुपैयाँसहित पक्राउ गरिएको हो ।

त्यसैगरी, बाराको परवानीपुर गाउँपालिका– ४ का स्थायी बासिन्दा दीपककुमार सोनारलाई तीन लाख रुपैयाँसहित पक्राउ गरिएको हो ।

अभियुक्तहरूलाई मुलुकी अपराध संहिता, २०७४ को दफा १२५ को (क) बमोजिम (हुण्डीसम्बन्धी कारोबार गर्न नहुने) कसुरमा जिल्ला अदालतबाट पाँच दिनको म्याद लिई अनुसन्धान भइरहेको छ ।