भिजिट भिसा प्रकरणमा छानबिन समिति गठन गरेकोमा माओवादी सकारात्मक, सांसदलाई ह्विप नलगाउने

काठमाडौँ । भिजिट भिसा प्रकरणमा छानबिन गर्न सरकारले गठन गरेको छानबिन समितिप्रति प्रमुख प्रतिपक्ष दल नेकपा माओवादी केन्द्र सकारात्मक देखिएको छ । प्रधानमन्त्री निवास बालुवाटारमा सोमबार राति बसेको मन्त्रिपरिषद् बैठकले पूर्वमुख्यसचिव शंकरदास वैरागीको नेतृत्वमा छानबिन समिति गठन गरेको थियो ।

समिति गठन गरेकोमा माओवादीका प्रमुख सचेतक हितराज पाण्डेले सकारात्मक कदम भएको बताए । यद्यपि समितिको कार्यक्षेत्र हेरेर मात्र थप धारणा बनाउने जानकारी दिए ।

‘छानबिन समिति गठन गर्नुपर्ने हाम्रो माग नै हो । सरकारले भिजिट भिसा प्रकरणमा जुन छानबिन समिति गठन गरेको छ । त्यसलाई सकारात्मक रुपमा लिएका छौँ । तर टिओआर लगायत विषयमा थप अध्ययन गरेर थप धारणा बनाउँछौँ’,  उनले भने ।

भिजिट भिसा प्रकरणमा गृहमन्त्री रमेश लेखक समेत संलग्न रहेको आरोप लगाउँदै माओवादीले रास्वपा र नेकपा एकीकृत समाजवादीसँग मिलेर १८ दिन संसद् अवरोध गरेको थियो । जेठ ३० गते सत्तापक्षसँग दुई बुँदे सहमति भएपछि संसद्को  अवरोध हटाएको थियो ।

यस्तै संसदमा पेस भएको आर्थिक वर्ष २०८२-८३ को बजेट पारित गर्ने विषयमा माओवादीका सांसदहरूलाई ह्विप जारी नगरिएको बताए ।