देवरले गरे १६ दिने सुत्केरी भाउजूको हत्या

काठमाडौँ । कैलालीमा देवरले १६ दिने सुत्केरी भाउजूको हत्या गरेका छन् । गौरीगंगा नगरपालिका वडा नम्बर ७ कैलाशपुरकी १६ बर्षीया तुलसी नाथको बिहीबार राती उनकै सहोदर देवर नवीन नाथले हत्या गरेको प्रहरीले जनाएको छ ।

भाउजूले ‘कमाउनु पर्दैन’ भनेपछि हत्या गरेको अनुसन्धानबाट खुलेको छ । तुलसी १६ दिने सुत्केरी थिइन् । इलाका प्रहरी कार्यालय मालाखेतीका अनुसार, सामान्य मनमुटाबले हत्या तहको घटनामा पुगेको खुल्न आएको हो । घटना भएको दिन बिहानसम्म अवस्था सामान्य थियो । त्यस बिहान बच्चालाई खोप लगाउन तुलसी स्वास्थ्य चौकी गएकी थिइन् । फर्किँदा सबैले खाना खाइसकेका र तुलसीका लागि खाना राखेका थिएनन् ।

उनले चाउचाउ खाएर चित्त बुझाएकी थिइन् । त्यस क्रममा उनले कमाउने मेरै श्रीमान्, तर मलाई सुत्केरी अवस्थामा पनि खाना नराखिइदिने भनेकी रहिछिन् । त्यसले नवीनलाई असह्य भएको रहेछ । यही बिन्दुबाट तुलसीको हत्यासम्म पुगेको प्रहरीले जनाएको छ ।

तुलसीका श्रीमान् भारतको पुनामा मजदुरी गर्छन् । २० वर्षीय नवीन-दम्पती घरमै बस्छन् । सगोलको परिवारमा रहेका उनीहरुबीच आर्थिक अभावले पारिवारिक कलह बढिरहेको थियो ।