सार्कमा कालो बादल मडारियो, नेपालले चातुर्यपूर्ण दृष्टिकोण राख्नुपर्छ: सांसद गिरी

काठमाडौं।  नेपाली कांग्रेसका सांसद दीपक गिरीले भारत र पाकिस्तानबीच युद्ध नगर्ने सहमति भए पनि सार्कमा कालो बादल मडारिरहेको बताएका छन् । भारत–पाकिस्तान युद्ध रोकिँदा नेपाललाई फाइदा भएको उनले बताए ।

मंगलबार बसेको प्रतिनिधिसभा बैठकको विशेष समयमा कांग्रेस सांसद गिरीले सार्कमा कालो बादल मडारिरहेकाले नेपाल सरकारले चातुर्यपूर्ण दृष्टिकोण राख्नुपर्ने बताएका हुनु । ‘सार्कमा कालो बादल मडारिएको छ । काश्मीरको पहलगाममा जुन घटना भयो, त्यसको भर्त्सना गरेको छु ।

भारत-पाकिस्तान युद्ध नहुने सिजफायरको स्थिति बनेको छ, त्यसको स्वागत गर्छु, जसले गर्दा छिमेकीलाई अप्ठ्यारो पर्ने परिस्थिति थियो,’ सांसद गिरीले भने, ‘महंगी बढ्ने र कठिन आर्थिक अवस्थाबाट गुज्रिने खतरा थियो ।

छिमेकीमा युद्ध भएको भए नेपाललाई गाह्रो हुन्थ्यो । युद्धविराम भए पनि सार्कमा कालो बादल मडारिरहेको छ, नेपाल सरकारले चातुर्यपूर्ण दृष्टिकोण राख्नु पर्छ ।’

नेकपा एमालेकी सांसद जुलीकुमारी महतोले पनि भारत–पाकिस्तान युद्धविरामको स्वागत गरेकी छिन् ।