मल नदिएर सरकारले किसानमाथि अन्याय गर्‍यो : साह

काठमाडौँ । आम जनता पार्टी (आजपा) का अध्यक्ष तथा पूर्वमन्त्री प्रभु साहले  किसानले बाली लगाउने र बिउ छर्ने बेलामा नै मलखादको हाहाकार भएको बताएका छन् । मलखादको हाहाकार मच्चाएर दुई तिहाइको बलियो सरकारले नै खुलेआम कालोबजारी गरेर किसानमाथि अन्याय गरेको उनले आरोप लगाए ।

प्रतिनिधि सभाको बुधबार बसेको बैठकलाई सम्बोधन गर्दै साहले तराई- मधेससहित पहाडका किसानहरू मलको अभावले तड्पिरहेको बेला सरकार र प्रहरीको उच्च ओहोदामा बस्नेहरू किसानलाई लुटेर महल बनाउने कार्य आफूलाई स्वीकार्य नभएको बताए ।

‘सम्माननीय सभामुख महोदय, अहिले मल, खादको अभाव छ, हाहाकार छ, बाली लगाउने बेला, बिउ छर्ने बेलामा नै किसानले मल पाएका छैनन् । मल पाए पनि दुईदेखि तीन गुणा महँगोमा पाएका छन् ।

त्यो पनि सरकारी निकायले दिने ठाउँमा होइन, पसलहरूमा पाइराखेका छन् । म सम्माननीय प्रधानमन्त्रीज्यूलाई सोध्न चाहन्छु–यो मल खरिद र वितरणको जिम्मा तपाईँको हो कि होइन ? केन्द्रीय सरकारको हो कि होइन ? यदि हो भने किसानप्रति किन यसरी अन्याय गर्नुहुन्छ ?,’  साहले भने ।

पूर्वमन्त्री साहले नेपालको मूल आयस्रोत भनेको नै कृषि क्षेत्र भएको उल्लेख गरे । तर, कृषि क्षेत्रमा नै विभेद गरिएको कुरा भने पीडादायी भएको उनको गुनासो छ । किसानलाई मलखाद उपलब्ध गराउने जिम्मेवारी सरकारको भए पनि सरकार मौन बसेर किसानसँग खेलबाड गरिरहेको उनले बताए ।