राजेन्द्र लिङ्देनले हिरासतमा पुगेर भेटे मिश्र र राणालाई

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले प्रहरी हिरासतमा रहेका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणासँग भेट गरेका छन् ।

उनले हिजो (शनिबार) साँझ लिङ्देन उनीहरूलाई भेट्न प्रहरी कार्यालय पुगेका थिए । जिल्ला प्रहरी परिसर, भद्रकाली पुगेर उनले मिश्र र राणालाई भेट गरेका हुन् ।

‘मैले हिजो साँझ नै उहाँहरूलाई भेटेको हुँ,’ लिङ्देनले भने, ‘हाम्रो पार्टीका नेताहरू भएका कारण गएर अवस्था बुझेको थिएँ ।’यद्यपि भेटघाटमा भएका अन्य विषयबारे उनले खुलाएनन् ।

पार्टी कार्यालयमा केन्द्रीय कार्यसम्पादन समिति बैठक सकेपछि उनी त्यहाँ पुगेका थिए । गत शुक्रबार तीनकुनेमा भएको प्रदर्शनपछि प्रहरीले उनीहरूलाई सोही दिन राति पक्राउ गरेको थियो ।