नेता पक्राउ गरेकोमा राप्रपाको युवा संगठनले जनायो आपत्ति

हेटौंडा । राष्ट्रिय प्रजातान्त्रिक युवा संगठनका सदस्य सचिव निराजन बमलाई प्रहरीले पक्राउ गरेको घटनाप्रति संगठनले आपत्ति जनाएको छ ।संगठनका केन्द्रीय संयोजक सुजित केसीले विज्ञप्ति निकालेर बमलाई भरतपुर विमानस्थलबाट पक्राउ गरेको भन्दै आपत्ति जनाएका छन् ।

एक जिम्मेवार युवा नेतालाई विना कारण पक्राउ गरेर सरकारको आडमा प्रहरी प्रशासनले मनमानी र पूर्वाग्रहपूर्ण काम गरेको विज्ञप्तिमा उल्लेख छ । ‘विभिन्न राजनीतिक दलका नेताहरूले खुलेआम एकअर्कालाई गम्भीर आरोप लगाउँदा पनि कुनै कारबाही नहुने तर सामान्य नागरिकलाई आफ्नो विचार व्यक्त गरेकै भरमा पक्राउ गरी कारबाही गर्नु के कानुनसम्मत छ ?’, केसीले भनेका छन् ।

शनिबार संगठनको मकवानपुर अधिवेशनको क्रममा माओवादी अध्यक्ष तथा पुर्वप्रधानमन्त्री प्रचण्डको फोटोमा निराजनले लाइटर पारेर आगो लगाएका थिए । उनलाई प्रहरीले भरतपुरबाट पक्राउ गरेर हेटौंडातर्फ ल्याइँदैछ ।