यस्तो छ एमाले सचेतक बरालले संसदमा दर्ता गराएको जरुरी सार्वजनिक महत्वको प्रस्ताव (पूर्णपाठ)

काठमाडौँ । नेकपा एमाले संसदीय दलका सचेतक सुनिता बरालले संसदमा सार्वजनिक जरुरी महत्वको प्रस्ताव दर्ता गराएकी छन् । उनले प्रमुख पाँच दलका सांसदको समर्थनमा वातावरणीय प्रभाव मूल्यांकन (ईआईए) र प्रारम्भिक वातावरणीय परीक्षण (आईई)सँग सम्बन्धित जरुरी सार्वजनिक महत्वको प्रस्ताव प्रतिनिधि सभामा दर्ता गराएकी हुन् ।

उक्त प्रस्तावको समर्थकमा एमालेकै सांसद ठाकुरप्रसाद गैरे, नेपाली काँग्रेसका सांसद प्रतिमा गौतम, नेकपा माओवादी केन्द्रका सांसद माधव सापकोटा, राष्ट्रिय स्वतन्त्र पार्टी (रास्वपा) संसदीय दलका सचेतक सांसद निशा डाँगी र राष्ट्रिय प्रजातन्त्र पार्टी (राप्रपा)का सचेतक सांसद बिना लामा रहेका छन् ।

नेपालमा पर्यावरण कानूनको संरचना भए पनि वातावरणीय लेखा परीक्षणमा कानूनी संरचना नरहेको र यसले गर्दा वातावरणीय लेखा परीक्षणलाई कानूनी रूपमा अनिवार्य बनाउन आवश्यक रहेको भन्दै जरुरी सार्वजनिक महत्वको प्रस्ताव दर्ता गरिएको प्रस्तावमा उल्लेख छ । जसमा महालेखा परीक्षकको कार्यालयले तयार पारेको मार्गदर्शकले वातावरणीय लेखा परीक्षणको प्रक्रियालाई परिभाषित गरेको, तर यसलाई विधायिकी कानूनले निर्देश र विस्तार गर्न आवश्यक रहेको भनिएको छ ।

आजको आवश्यकतालाई महालेखाको महार्गदर्शनले धान्ने अवस्था नरहेको भन्दै प्रस्ताव दर्ता गरिएको जरुरी सार्वजनिक महत्वको प्रस्तावमा उल्लेख छ । दिगो विकास र वातावरणीय संरक्षणको सिद्धान्तमा आधारित संरचनाको आवश्यकता तत्कालै देखिएको र जसमा वातावरणीय संरक्षण र आर्थिक विकासबीच सन्तुलन कायम राख्न र उद्योगको सुनिश्चित गर्न कानूनी संरचना निर्माण गर्नु अत्यावश्यक रहेको प्रस्तावमा उल्लेख छ ।