रास्वपा संसदीय दलको बैठक बस्दै, यस्ता छन् एजेन्डा

काठमाडौ । राष्ट्रिय स्वतन्त्र पार्टी (रास्वपा)को संसदीय दलको बैठक बस्दैछ । रास्वपा संसदीय दलका उपनेता विराजभक्त श्रेष्ठले संसदीय दलको बैठक बोलाएका हुन् । बैठक बिहान ११ बजे पार्टी कार्यालय च:मतिमा बस्नेछ । 

पार्टी सभापति तथा संसदीय दलका नेता रवि लामिछाने निलम्बनमा परेकाले उपनेता श्रेष्ठकै अध्यक्षतामा बैठक बस्नेछ । दलका नेता लामिछाने सांसद पदबाट निलम्बित भएपछि उपनेता श्रेष्ठले पहिलोपटक विधानअनुसार कार्यकारी अधिकार प्रयोग गर्दै दलको बैठक बोलाएका हुन् ।

पार्टी विधानको दफा १३ (१) बमोजिम बैठक बोलाइएको रास्वपा सांसदहरूले बताएका छन् । बैठकमा संसद्को आगामी अधिवेशन तयारीका विषयमा छलफल हुनेछ । संसद्को हिँउदे अधिवेशन यही माघ १८ गतेदेखि शुरू हुँदैछ । 

बैठकमा सरकारले हालै ल्याएका विभिन्न अध्यादेशका बारेमा समेत छलफल हुने नेताहरूले बताएका छन् । रास्वपाले सरकारले जारी गरेको अध्यादेश खोटपूर्ण रहेको बताउँदै आएको छ । 

अध्यादेशका अन्तर्वस्तुमाथि भने गुण र दोषका आधारमा बहस गर्ने रास्वपा नेताहरूले बताएका छन् ।