६१ वर्ष कैद र तीन लाख ५२ हजार जरिवाना भएका फरार प्रतिवादी पक्राउ

काठमाडौं। विभिन्न मुद्दामा गरेर ६१ वर्ष कैद र तीन लाख ५२ हजार ७७८ रूपैयाँ जरिवाना सुनाइएका एक व्यक्ति पक्राउ परेका छन् ।

कपिलवस्तु जिल्ला अदालतका विभिन्न लगत नम्बरहरू १९८०,१९८९,१९९०,१९९१ र १९९२ मा ३ वटा खुन डाँका,एक वटा डाँका तथा एक वटा चोरी मुद्दा गरी जम्मा ५ वटा मुद्दामा विभिन्न मितिमा फैसला भई कैद र जरिवाना सुनाइएका ५७ वर्षीय सोमई भन्ने प्रकाश कहार पक्राउ परेका हुन् ।

जिल्ला प्रहरी कार्यालय टोलीले कपिलवस्तुको साविक शिवनगर गाविस-५ हाल कृष्णनगर नगरपालिका-१ गुर्चिहवाका कहारलाई यही पुस २३ गते साँझ पक्राउ गरेको हो ।

उनलाई तोकिएको कैद तथा जरिवाना असुलउपरका लागि कपिलवस्तु जिल्ला अदालतमा पेश गरेर कारागार चलान गरिएको डीएसपी, मोहन मणि अधिकारीले जानकारी दिए ।