जुवा खेलेको आरोपमा भक्तपुरबाट ५ जना पक्राउ

काठमाडौँ । प्रहरीले भक्तपुरमा सञ्चालित जुवा खालमा छापा मारेर ५ जनालाई पक्राउ गरेको छ । सुर्यबिनायक नगरपालिका–८ बाट प्याचा खेलिरहेको अवस्थामा ५ जनालाई पक्राउ गरिएको जिल्ला प्रहरी परिसर भक्तपुरका डीएसपी ढुण्डीराज नेउपानेले बताए ।

काठको गट्टा बनाएर हारजित हुनेगरी प्याचा खेल्ने गरिन्छ । जुवा खालबाट प्रहरीले ३ लाख ५६ हजार नगद बरामद गरेको छ । पक्राउ पर्नेमा धादिङ घर भएका निदेश दाहाल, भक्तपुरको मध्यपुर थिमी बस्ने शिवराम श्रेष्ठ, राजु नकर्मी, उमेश श्रेष्ठ र पदम श्रेष्ठ छन् ।

आरोपीहरुले सुर्यबिनायकको गणेश मन्दिर नजिकै प्याचा खेलेका हुन् । आरोपीहरु बिरुद्ध जुवा ऐन अन्तर्गतको कसुरमा अनुसन्धान भइरहेको डीएसपी नेउपानेले जानकारी दिए ।