साताको सेयर बजार : फाइनान्स र बैंकमा आकर्षण, ८ कम्पनीको मूल्य बढ्यो

काठमाडौं । दशैंपछिको यो साता सेयर बजार २.८८ प्रतिशत बढेको छ ।

दशैंअघि गत साता २६६८ अंकमा बन्द भएको बजार यो साता ७७ अंक बढ्दै २७४५ अंकमा पुगेको हो । दशैं विदाका कारण यो साता ३ दिन मात्रै कारोबार भयो । तीनै दिन बजार बढ्यो । मंगलबार ३१.४८, बुधबार ४३.२२ र बिहीबार २.४७ अंकले बढ्यो ।

बजार बढ्दा कारोबार रकम पनि बढ्दै गएको छ । मंगलबार ३ अर्ब ६ करोडको कारोबार भएकोमा बुधबार ५ अर्ब ६६ करोड र बिहीबार ७ अर्ब १९ करोडको भयो । साउन ३० गते ३००० अंकसम्म पुगेको बजार असोज १३ गते २४६४ अंकसम्म झर्‍यो । त्यसयता बजार पुनः उकालो गतिमा देखिएको छ ।

घट्दो ब्याजदर र पर्याप्त लगानीयोग्य रकमले बजारलाई साथ दिइरहेको छ । बजारको पूँजीकरण ४३ खर्ब ६५ अर्ब रुपैयाँ बराबर पुगेको छ । साउन ३० गते यो हालसम्मकै उच्च ४७ खर्ब ६५ अर्ब रुपैयाँसम्म पुगेको थियो ।