गोकुल बाँस्कोटाको रविलक्षित टिप्पणी– 'चितवनमा जान्नेलाई छान्ने चान्स आउने पक्काजस्तै छ'

काठमाडौँ । एमाले नेता तथा प्रतिनिधिसभा सदस्य गोकुल बाँस्कोटाले रास्वपाका सभापति रवि लामिछानेविरुद्ध सहकारी ठगीमा मुद्दा चल्ने दाबी गरेका छन् । 

सहकारी ठगीसम्बन्धी छानबिन समितिले दिएको प्रतिवेदनअनुसार उनीविरुद्ध मुद्दा चल्ने उनको दाबी छ । बाँस्कोटाले वकिली तर्क र थापा प्रतिवेदनमा राजनीतिक सौदाबाजी नभए चितवन–२ मा फेरि उपनिर्वाचन हुने अवस्था रहेको समेत सामाजिक सञ्जाल फेसबुकमार्फत बताएका छन् । 

‘चितवनका नेता पनि जनता पनि कति जाँगरिला भने चुनाव त पाचवर्षमा तीन वटा गर्न पनि तयारी हालतमा बस्न सक्ने। कानुनविदका वकिली तर्क र थापा प्रतिवेदनमा राजनीतिक सौदाबाजी नभए जान्नेलाई छान्ने त्यो चान्स आउने हिउँदमै पुरा हुने कुरा पक्का जस्तै छ भनिन्छ। ७८औं जिल्ला त्यसै भन्या रैनछ चितवनलाई’, उनको भनाइ छ। 

सूर्य थापा नेतृत्वको समितिले लामिछानेलाई सहकारीको रकम अपचलनमा कारबाही सिफारिस गरेको छ । तर, लामिछानेसहित रास्वपाका नेताहरुले भने क्लिन चिट पाएको दाबी गर्दै आएका छन् ।