चोरी गर्ने र चोरीको सामान किन्ने तिन जना पक्राउ

काठमाडौँ । जिल्ला प्रहरी कार्यालय सङ्खुवासभाबाट खटिएको प्रहरीले सुन तथा गहना चोर्ने र चोरीको सामान किनेको आरोपमा ३ जनालाई पक्राउ गरेको छ ।

पक्राउ पर्नेमा खाँदबारी नगरपालिका–६ घर भएका १९ वर्षीय अनिस विष्ट, मोरङको सुन्दरहरैंचा स्थित रोनिस ज्वेलर्सका संचालक महेन्द्र कुमार थापा र खाँदबारी नगरपालिका–३ घर भएका ३७ वर्षीय रविन विश्वकर्मा छन् ।

साउन ९ मा विष्टले खाँदबारी–७ स्थित बेलडाँडाको एउटा घरबाट सुनका गहना र मोबाइल चोरी गरेको प्रहरीको अनुसन्धानबाट थाहा भएको छ ।

चैनपुरबाट बस चढेर इटहरीतर्फ जाँदै गरेको अवस्थामा उनलाई पक्राउ गरिएको जिल्ला प्रहरी कार्यालय सङ्खुवासभाका इन्स्पेक्टर राम कुमार लामिछानेले  बताए । आरोपीले खाँदबारी–६ स्थित पाङ्खामा दोस्रो घरमा चोरी गरेको प्रहरीको अनुसन्धान निष्कर्ष छ ।

विष्टले चोरेका सुनका गहना महेन्द्र कुमार थापा र रविन विश्वकर्माले खरिद गरेका हुन् ।