गृहमन्त्री रवि लामिछानेको विषयलाई लिएर सदनमा सत्ता–प्रतिपक्ष आमने-सामने

काठमाडौं। सहकारी ठगीको आरोप लागेका गृहमन्त्री रवि लामिछानेमाथि संसदीय छानबिन समिति गठन गर्ने/नगर्ने विषयलाई लिएर सत्ता प्रतिपक्षका सांसद आमने-सामने भएका छन् । 

मंगलवार बसेको प्रतिनिधि सभा बैठकमा सभामुखले सत्तापक्षका सांसदलाई बोल्न समय दिएपछि प्रतिपक्षी सांसदले संसद्‌मा होहल्ला गरेका छन् । बैठकमा गृहमन्त्री लामिछाने उपस्थित थिए ।

सत्ता र प्रतिपक्षी दलका सांसद उठेर सवाल जवाफ गर्न थालेपछि सभामुख देवराज घिमिरेले प्रतिनिधि सभा बैठक १५ मिनेटका लागि स्थगित गरेका छन् । रवि लामिछाने माथि संसदीय छानबिनको अल्टिमेटम दिएको कांग्रेसले आज संसद् अवरुद्ध गर्ने चेतावनी दिएको थियो ।

संसद बैठकअघि प्रधानमन्त्री पुष्पकमल दाहाल प्रचण्डले बालुवाटारमा गरेको छलफल निष्कर्षविहीन बनेको थियो । संसदीय दलबाट निर्णय गराएरै कांग्रेसले रविमाथि संसदीय छानबिन समिति पार्टीको बटमलाइन भएको बताएको छ ।