शिशु चोरी प्रकरण: तीन जना पक्राउ

काठमाडौं । काठमाडौंको थापाथलीस्थित परोपकार प्रसूति तथा स्त्रीरोग अस्पतालको कम्पाउन्डबाट शिशु चोरेको आरोपमा ३ जनालाई प्रहरीले पक्राउ गरेको छ । 

पक्राउ पर्नेमा दैलेख नौमुले गाउँपालिका–१, घर भई काठमाडौंको काँडाघारी बस्ने २४ वर्षीया मनकुमारी सिंहसहित उनका श्रीमान् र दिदी रहेका छन् । 

घटना अनुसन्धानका लागि उनका श्रीमान् २८ वर्षीय नरेन्द्र मल्ल र दिदी शारदा शाहीलाई पनि नियन्त्रणमा लिइएको जिल्ला प्रहरी परिसर काठमाडौंले जनाएको छ । 

प्रहरीका अनुसार शिशुसहित उनीहरूलाई शुक्रबार राति काँडाघारीबाट पक्राउ गरिएको हो । 

शुक्रबार दिउँसो १२ बजे प्रसूतिगृहमा फलोअप उपचारमा ल्याइएकी २६ दिने शिशुलाई लाइनमा उभिएकी एकजना महिलाले लिएर गायब भएकी थिइन् ।

घटनाबारे थप अनुसन्धान भइरहेको प्रहरीको भनाइ छ ।