माओवादी स्थायी कमिटी बैठकबाट सांगठनिक कार्यविभाजन

काठमाडौँ । नेकपा माओवादी केन्द्रको सांगठनिक कार्यविभाजन आगामी स्थायी कमिटी बैठकबाट गरिने भएको छ । माओवादीको बुधबार सम्पन्न पदाधिकारी बैठकले आगामी पुस अन्तिम साता बस्ने स्थायी कमिटी बैठकबाट नेताहरुको कार्यविभाजन टुंगो लगाउने निर्णय भएको एक नेताले जानकारी दिए । 

‘पार्टी स्थायी समितिको बैठक पौषको अन्तिम हप्तामा बस्ने निर्णय भएको छ’, ती नेताले भने, ‘पार्टीको जनतासँग माओवादी अभियानका साथै विधान मस्यौदा माथि छलफल गरेर परिमार्जन गरिन्छ । सोअनुसार तल्ला कमिटीहरुमा छलफल तथा सुझावका लागि पठाउने र एक महिनासम्म छलफल गराउने भन्ने भएको छ ।  सांगठनिक कार्यविभाजन पनि स्थायी समितिको बैठकबाट गर्ने निर्णय भएको छ ।’ 

उनका अनुसार विधान अधिवेशन फागुनको पहिलो सातामा गर्ने निर्णय भएको छ भने मिति, स्थान र प्रतिनिधि बारे स्थायी समितिको बैठकले टुङ्गो लगाउने छ । पदाधिकारी बैठकले नै उपाध्यक्ष पम्फा भुसालको नेतृत्वमा महासचिव देव गुरुङ, उपमहासचिवहरु गिरिराजमणि पोखरेल, वर्षमान पुन, जनार्दन शर्मा, सचिवहरु गणेश शाह र सुरेन्द्र कुमार कार्की सम्मिलित सात सदस्यीय विधान मस्यौदा समिति गठन गरिएको छ । उक्त समितिले १५ दिनभित्र विधानको मस्यौदा तयार गरी सक्ने बताइएको छ ।