रास्वपासँग केही छैन, पुनर्निर्माणको ठेक्का चाहियो : गोकुल बास्कोटा

काठमाडौँ । नेकपा एमालेका नेता गोकुल बास्कोटाले नयाँ भन्ने राष्ट्रिय स्वतन्त्र पार्टीसँग केही नभएको बताएका छन् । एमाले चौरीदेउराली काठमाडौँ सम्पर्क मञ्चको कार्यक्रममा सम्बोधन गर्दै उनले नयाँ भन्नेहरूलाई पुनर्निर्माणको ठेक्का चाहिएको छ भन्दै कटाक्ष गरेका हुन् ।

रास्वपाको बिहीबार बसेको बैठकको निर्णय सार्वजनिक गर्दै प्रवक्ता डा. मुकुल ढकालले प्रतिनिधि सभाको चौथो ठूलो दल भएकाले भूकम्पको ‘पुनर्निमाणको ठेक्का’ सरकारसँग मागेपछि नेता बास्कोटाले कटाक्ष गरेका हुन् ।

उनले भने, ‘नयाँ नयाँ नयाँ । नयाँसँग पनि केही छैन । देखिसक्या छ, थाहा भइसक्यो नि १ पुनर्निर्माणको ठेक्का नयाँलाई चाहियो, कति नै इन्जिनियरिङ कला भए जस्तो । केही मतलबको कुरा छैन । एउटा देश निर्माणको लागि जनता सबैभन्दा महत्त्वपूर्ण हुन् ।’

उनले चिहानमा पुगिसकेको राजतन्त्र ब्युँताउन अब सम्भव नभएकोसमेत बताए ।