मोरक्को भूकम्पः दुई हजार ८०० को मृत्यु, सहायता नपाएको प्रभावितको गुनासो

काठमाडौं। मोरक्कोमा भूकम्पबाट मृत्यु हुनेको संख्या दुई हजार आठ सय पुगेको छ भने तीन हजार जना घाइते छन् । अझै केही मानिसहरू हराइरहेको अन्तर्राष्ट्रिय सञ्चार माध्यमहरूले जनाएका छन् । 

अधिकांश भूकम्पपीडितले सरकार तथा अन्य निकायबाट सहायता नपाएको गुनासो गरेका छन् । भूकम्पबाट आघातग्रस्त घरबारविहीनहरूले आफ्नो ज्यान जोकिए पनि बाँकी जीवन जिउन केही नभएको गुनासो गरेका छन् । गत शुक्रबारदेखि नै खाना र आवासका निम्ति भौतिरिनुपरेको उनीहरूले बताएका छन् ।

सरकार वा अन्य सहायता निकायबाट आफूहरूलाई कुनै सहयोग प्राप्त नभएको उनीहरूको भनाइ छ ।भूकम्पबाट अधिक प्रभावित ताफेघते गाउँका एक जना पीडितका अनुसार करिब दुई सय जनाको बसोबास रहेको गाउँका ९० जनाको शव फेला परेको छ भने अन्य हराइरहेका छन् । 'यो गाउँका मानिस या त अस्पतालमा छन् वा जीवित छैनन्,' बिलौना गर्दै उनले भने । 

भवनका भग्नावशेष सफा गर्ने यान्त्रिक उपकरणको अभावमा खोज जटिल भएको छ । परम्परागत घरका इँटा र ढुङ्गा बाटामा असरल्ल छन् । हसन आफ्ना काका अझै पनि भग्नावशेषमुनि दबिएको बताउँछन् । तर उनलाई जीवितै बाहिर निकाल्ने कुनै आशा छैन । 

'राज्यले परित्याग गरेको महसुस गरिहेका छौँ, हामीलाई मद्दत गर्न कोही आएको छैन । हाम्रा घर भत्किएका छन्, अब हामी कहाँ बस्ने ?,' उनले भने । एक सयभन्दा कमको बसोबास रहेको उनको गाउँपालिकामा १६ जनाको शव फेला परेको भए पनि भग्नावशेषमा पुरिएका पशुचौपाया गन्हाएर स्थानीय वायु नै प्रदूषित भएको छ । 

मोरक्कोको पर्यटकीय नगर मराकेसभन्दा ७२ किलोमिटर दक्षिणपश्चिममा केन्द्रविन्दु बनाएर गत शुक्रबार राति ६.८ म्याग्निच्युडको भूकम्पको विनाशकारी भूकम्प गएको थियो।स्पेन, संयुक्त अधिराज्य र कतारले खोज तथा उद्धारमा सघाउन आ–आफ्नो टोली परिचालन गरका छन् । मोरक्कोका उद्धारकर्मीसँगको समन्वयमा उनीहरूले काम गरिरहेका गृह मन्त्रालयले जनाएको छ । 

सावरी साधन पुग्न नसक्ने अनकन्टार पहाडी गाउँमा हेलिकप्टरबाट खाद्य सामग्री खसालिएको जनाउँदै गृह मन्त्रालयले यथाशक्य चाँडो सबै पीडितलाई राहत सामग्री उपलव्ध गराउने प्रतिबद्धता व्यक्त गरेको छ। यसैबीच, युरोपेली सङ्घले मानवीय सहायतास्वरुप एक लाख युरो तत्काल उपलब्ध गराउने घोषणा गरेको छ । यसअघि सन् १९६० को भूकम्पमा परी मोरक्कोमा १५ हजार जनाको मृत्यु भएको थियो । भूकम्पबाट अगादिर नगर तहसनहस भएको थियो ।