प्रतिनिधि सभा बैठक: सांसदहरू बोलेपछि गृहमन्त्रीले जवाफ दिने

काठमाडौं। प्रमुख प्रतिपक्षी दल नेकपा एमालेको विरोधका कारण १३ दिनदेखि अबरुद्ध प्रतिनिधि सभा बैठक मंगलवार सुचारु भएको छ । प्रधानमन्त्री निवास बालुवटारमा दिउँसो बसेको तीन दलका शीर्ष नेताको बैठकमा भएको सहमतिपछि प्रतिनिधि सभा बैठक सुचारु भएको हो । 

सुन तस्करी सम्बन्धमा भइरहेको अनुसन्धानबारे संसदमा गृहमन्त्री नारायणकाजी श्रेष्ठको जवाफ सुन्न एमाले तयार भएपछि बैठक सुचारु भएको हो । यद्यपि एमालेले उच्चस्तरीय छानबिन समिति गठन गर्नुपर्ने माग नछाडेको बताएको छ । 

गृहमन्त्रीको सम्नबोधन अघि सांसदहरूलाई दलीय प्रतिनिधित्वको आधारमा आकस्मिक समयमा बोल्न दिइने छ । विमानस्थल भन्सार कार्यालय बाहिरबाट समातिएको सुनबारे छानबिन गर्न उच्चस्तरीय छानबिन समितिको माग गर्दै साउन १० देखि एमालेले प्रतिनिधि सभा अबरुद्ध गर्दै आएको थियो ।

त्यसयताका बैठक भने सूचना टाँसेर स्थगित गरिएको थियो ।