दिल्लीमा गोली प्रहार गरेर महिलाको हत्या

एजेन्सी । भारतको राजधानी दिल्लीमा गोली प्रहार गरेर महिलाको हत्या गरिएको छ ।

महिलाको हत्या गरेर घरतिर फरार भएका ती व्यक्तिले आफूमाथि पनि गोली प्रहार गरेर आत्महत्या गरेको भारतीय सञ्चारमाध्यमले जनाएका छन् ।

दिल्लीको डाबरी क्षेत्रमा गोली प्रहारबाट ४२ वर्षीया रेनू गोयलको हत्या गरिएको हो । उनको घरनजिकै हत्या गरिएको छ । हत्यारा र महिला दुवै जना एकअर्कासँग परिचित रहेका जनाइएको छ ।

गोली प्रहार गर्ने व्यक्ति २३ वर्षीय आशिष हुन् । उनी पैदल आएर गोली प्रहार गरी घरतिर भागेका थिए । प्रहरीले उनको घरमा पुगेर खोजबिन गर्दा उनी घरभित्र मृत अवस्थामा भेटिए । उनले आफैंमाथि पनि गोली प्रहार गरेको पाइएको छ । मृतक दुवै जना एकै जिम हाउसमा जाने गरेका थिए ।