नेदरल्यान्ड्स विरुद्धको अन्तिम एकदिवशीय खेलमा नेपाल १ रनले विजयी

चितवन । नेदरल्यान्ड्स विरुद्धको अन्तिम एकदिवशीय अन्तर्राष्ट्रिय क्रिकेट खेलमा नेपाल  १ रनले  विजयी भएको छ ।  जितसँगै नेपाल र नेदरल्यान्ड्बीचको दुई एक दिवसिय श्रृखंला १–१ को बराबरीमा टुंगिएको छ ।

२१७ रनको चुनौति पछ्याउँदै ब्याटिङ गरेको नेदरल्यान्ड्सले निर्धारित ५० ओभरमा सबै विकेटको क्षतिमा २१५ रन मात्रै बनाउन सक्यो । जितको नजिक पुगेको नेदरल्यान्ड्सको अन्तिम विकेट कप्तान पारस खड्काले रन आउट गरेपछि नेपाल विजयी भएको थियो । अन्तिम बलमा नेदरल्यान्ड्सलाई जितका लागि २ रनको आवश्यकता थियो ।

नेदरल्यान्ड्सका लागि वेस्लेय बरेसीले ७१ रन बनाए । उनले ८९ बलमा ८ चौकाको मद्दतमा उक्त रन बनाएका थिए । त्यस्तै, नेदरल्यान्ड्सका ड्यानियल टेर ब्राकले ३९, पिटर सेलयरले २१, बेन कोपरले १९ र शेन स्नाटरले १२ रनको योगदान दिए ।

बलिङतर्फ नेपालका लागि सन्दीप लामिछानेले ३ विकेट लिए । ललित भण्डारी र कप्तान पारसले समान २ लिए । सोमपाल कामी, बसन्त रेग्मी र दीपेन्द्रसिंह ऐरीले समान १ विकेट लिए ।

यस अघि टस जितेर पहिले ब्याटिङ गरेको नेपालले ४८ ओभर २ बलमा अलआउट हुँदै २ सय १६ रन जोडेको थियो । कप्तान पारस खड्का र सोमपाल कामीको अर्धशतक पार गरेका थिए । कप्तान पारसले ५१ र सोमपाल कामीले ६१ रन बनाएका थिए ।  सुबास खकुरेल र दीपेन्द्रसिंह एेरीले समान १९/१९ रन बनाएका थिए । ज्ञानेन्द्र मल्लले १३ र अनिल शाहले चार रन बनाएका थिए ।  रोहित पौडेलले ६, आरिफ शेखले १६,  सन्दीप लामिछानेले ८, बसन्त रेग्मी १ रनमा आउट भएका थिए ।

घरेलु टोली नेदरल्यान्ड्सका फ्रेड कासानेसले ३, मिचेल रिप्पोन र पिटर सेलारले समान २, पाउ भान मेकिरेन र साने स्नाटेरले समान १ विकेट लिएका थिए  ।