परजीवीलाई परास्त नगरेसम्म श्रमजीवीहरुको उत्थान हुँदैन : मन्त्री गुरुङ

काठमाडौँ । कानून, न्याय तथा संसदीय मामिलामन्त्री एवं नेपाली काँग्रेसका उपसभापति धनराज गुरुङले परजीवीलाई परास्त नगरेसम्म श्रमजीवीहरुको उत्थान हुन नसक्ने बताएका छन् ।

सोमवारबाट काठमाडौंमा शुरु भएको ट्रेड युनियन काँग्रेसको सातौं महाधिवेशनलाई सम्बोधन गर्दै उनले देशमा श्रमजीवी र परजीवी गरी दुई प्रकारका जीवी रहेको बताए । परजीवीलाई परास्त नगरेसम्म श्रमजीवीहरुले सम्मान पाउन नसक्ने भन्दै उनले भ्रष्ट प्रवृत्तिको जरो हल्लाउने काम टे«ड युनियन काँग्रेसले गर्नुपर्ने बताए ।

‘अब यो मुलुकमा एउटा प्रवृत्तिको जरो हल्लउने काम तपाईहरुले नै गर्नुपर्छ,’ उनले भने, ‘त्यो भनेको भ्रष्ट प्रवृत्तिको जरो हल्लाउने काम तपाईहरुले गर्ने हो । नेपाली राजनीतिमा दुई वर्ग छन् । दुई वटा जीवी छन् । एउटा श्रमजीवी र अर्को परजीवी । परजीवीलाई परास्त नगरेसम्म श्रमजीवीहरुको उत्थान हुन सक्दैन । ट्रेड युनियन काँग्रेसले मागेर होइन, खोसेर अधिकार लिने हो । अब खोस्न अघि बढ्नुस् । आज यो मुलुक भ्रष्ट प्रवृत्तिका कारणले गर्दा बन्न नसकेको हो । भ्रष्ट प्रवृत्ति बदल्न आवश्यक छ ।’