बैंक तथा वित्तीय संस्था नयाँ शोषकको रूपमा उदाएः पर्यटनमन्त्री किराँती

काठमाडौं । संस्कृति, पर्यटन तथा नागरिक उडड्यनमन्त्री सुदन किराँतीले बैंक तथा वित्तीय संस्थालाई ‘नयाँ शोषक’ कोे संज्ञा दिएका छन । होटल एशोशिएसन अफ नेपालले काठमाडौंमा आयोजना गरेको एक कार्यक्रममा बोल्दै उनले यस्तो बताएका हुन।

बैंक तथा वित्तीय संस्थाहरुले कम्प्युटर लिएर गाउँ जाने र त्यहाँका आमाहरुलाई ऋण दिएर डोरीमा पासो लगाउन बाध्य पार्ने थुप्रै कथाहरु रहेको मन्त्री किराँतीले बताए। छोराछोरीहरुलाई मोबाइल किन्न लिएको ऋण तिर्नका लागि गाउँले आमाहरुको घरखेत उठेको र पछि चिन्ताले डोरीमा पासो लगाउने स्थिति बनेको पनि उनले उल्लेख गरे ।

मन्त्री किराँतीले पहिले शोषकहरु दौरा(सुरुवाल लगाएर तमसुक बोकेर आउने गरेको र अहिलेको नयाँ शोषक भने कम्प्युटर लिएर गाउँ जाने गरेको बताए । उनले शहरमा पनि बैंक तथा वित्तीय संस्थाहरुको ब्याज तिर्न नसकेर सर्वसाधारणले सास्ती व्यहोर्नु परेको स्मरण गराए। मन्त्री किराँतीले बैंक तथा वित्तीय संस्थाहरुको ब्याज घटाउन सक्ने अवस्था नरहेको पनि बताए ।

प्रकृति र संस्कृतिलाई जोगाउने खालको विकास नीतिको आवश्यक्ता भएको मन्त्री किराँतीले बताए। होटल व्यवसाय पर्यटनको मेरुदण्ड भएको उल्लेख गर्दै उहाँले त्यस क्षेत्रको विकासमा सरकारले सकेको सहयोग गर्ने समेत बताए।