अघिल्लो वर्षको शिक्षा लिएर नयाँ वर्षमा मेहनत गरौँ : मुख्यमन्त्री यादव

जनकपुरधाम । मधेस प्रदेशका मुख्यमन्त्री सरोजकुमार यादवले विक्रम संवत् २०८० को अवसरमा शुभकामना व्यक्त गरेका छन् । उनले शुक्रवार एक विज्ञप्ति प्रकाशित गरी नयाँ वर्ष २०८० प्रारम्भ भएको अवसरमा प्रदेश, देश तथा विदेशमा रहेका सम्पूर्ण नेपालीहरूलाई शुभकामना व्यक्त गरेका हुन् । उनले जारी गरेको विज्ञप्तिमा गरिबी नेपालको प्रमुख समस्या रहेको उल्लेख गर्दै गुणस्तरीय शिक्षा र स्वास्थ्य प्रमुख आवश्यकता रहेको बताएका छन् । 

उनले आफू प्रदेशको विकासमा प्रयत्नशील रहेको बताउँदै नयाँ वर्षको आगमन सँगै सबै नयाँ जोस, नयाँ उमंग र नयाँ उत्साहका साथ आ–आफ्नो कर्म क्षेत्रमा जुट्नुपर्नेमा जोड दिएका छन् ।

मुख्यमन्त्री यादवले गत वर्षको अनुभवलाई शिक्षाको रूपमा ग्रहण गरी नयाँ वर्षमा अझ बढी मेहेनतका साथ कर्म क्षेत्रमा खरो उत्रँदै प्रदेशको समृद्धि र सुशासनका निम्ति खट्न सबैलाई आग्रह गरेका छन् ।