यी हुन् प्रतिनिधिसभातर्फ विजयी माओवादीका १२ उम्मेदवार

सफल खबर संवाददाता

शुक्रबार, ०९ मंसिर २०७९, १२ : २५
यी हुन् प्रतिनिधिसभातर्फ विजयी माओवादीका १२ उम्मेदवार

काठमाडौं । प्रदेश तथा प्रतिनिधि सभा निर्वाचनको मतपरिणाम आउने क्रम जारी छ । पछिल्लो ताजा मतपरिणामअनुसार माओवादी केन्द्रले १२ निर्वाचन क्षेत्रमा जित निकालेको छ ।

निर्वाचनअघि नेपाली कांग्रेसलगायतका दलहरूसँग गठबन्धन बनाएर गए पनि माओवादी केन्द्रले अपेक्षाकृत परिणाम भने हात पार्न सकेको छैन ।हालसम्मको मत परिणाम हेर्दा माओवादी तेस्रो दलको हैसियतमा देखिन्छ । देशभर ४० भन्दा बढी क्षेत्रमा उम्मेदवारी दिएको माओवादी केन्द्रले कतिपय स्थानमा हार व्यहोरेको छ भने झण्डै आधा दर्जन निर्वाचन क्षेत्रमा अग्रता लिइरहेको छ । 

हालसम्म १२ जना उम्मेदवारले भने विजय प्राप्त गरिसकेका छन् ।  जित निकाल्नेमा अध्यक्ष प्रचण्डलगायत छन् । प्रचण्ड गोरखा २ बाट प्रतिनिधिसभा सदस्य निर्वाचित भएका हुन् । उपमहासचिव वर्षमान पुन रोल्पाबाट निर्वाचित भएका छन् ।

अर्थमन्त्रीसमेत रहेका जनार्दन शर्माले रुकुम पश्चिमबाट जित हासिल गरेका छन् ।  जाजरकोटबाट शक्ति बस्नेत निर्वाचित भएका छन् । रामकुमार राईले खोटाङबाट विजय हासिल गरेका छन् । 

अमनलाल मोदी मोरङ ४ बाट प्रतिनिधिसभा सदस्य निर्वाचित भएका छन् । सिन्धुपाल्चोक १ बाट माधव सापकोटा, भोजपुरबाट सुदन किराती,  सिन्धुली २ बाट लेखनाथ दाहालले जित हात पारेका छन् । यस्तै एमालेका महासचिव शंकर पोखरेललाई हराउँदै दाङ २ बाट रेखा शर्मा विजयी भएकी छन् । 

शिक्षामन्त्रीसमेत रहेका देवेन्द्र पौडेलले बाग्लुङ २ बाट जित निकालेका छन् । पूर्णबहादुर घर्ती मगर रुकुम पूर्वबाट निर्वाचित भएका छन् । 

प्रतिक्रिया दिनुहोस