भेनेजुयलामा पहिरो : २२ जनाको मृत्यु, ५२ जना बेपत्ता

एजेन्सी । पहिरोका कारण भेनेजुयलाको लस तेहेरियास बजारका घरहरू बगेका छन् । राजधानी काराकासबाट दक्षिणमा रहेको लस तेहेरियासमा पहिरोले गम्भीर क्षति गरेको हो ।

पहिरोका कारण कम्तीमा २२ जनाको मृत्यु भएको छ । अरु ५२ जना बेपत्ता भएका छन् । ला निन्ना मौसमी प्रणालीका कारण परेको अविरल वर्षाले पहिरो गएको हो ।

उपराष्ट्रपति डेल्की रोड्रिग्वेजले आइतबार पहिरोका कारण प्रभावित क्षेत्रको अवलोकन गरेकी थिइन् । उद्धारकर्मीले बेपत्ताको खोजी गरिरहेको उनले बताइन् ।

राष्ट्रपति निकोलाश मदुरोले अवस्था ‘कठिन र दुःखदायी’ रहेको उल्लेख गरेका छन् । एल पातो नदीको बाँध फुटेपछि पहिरो गएको हो । पहिरो र बाढीको पानीले बजारका घरहरु बगाएको हो ।