लालपूर्जा वितरण र विदेश भ्रमण नगर्न निर्वाचन आयोगको निर्देशन

काठमाडौं । आगामी मंसिर ४ गते हुन लागेको प्रतिनिधिसभा र प्रदेशसभाको निर्वाचनअघि लालपूर्जा वितरण नगर्न निर्वाचन आयोगले राष्ट्रिय भूमि आयोगलाई निर्देशन दिएको छ । बिहीबार निर्वाचन आयोगले पत्र लेखेरै उक्त कार्य निर्वाचनअघि रोक्न निर्देशन दिएको हो ।

लालपूर्जा वितरणको कार्य रोकेर दुई दिनभित्र निर्वाचन आयोगलाई जानाकरी दिन पनि निर्देशन दिएको छ । निर्वाचनमा स्वच्छता र निष्पक्षता कायम राख्नका लागि तत्काललाई लालपूर्जा वितरण गर्ने कार्य रोक्ने निर्णय गरेको आयोगले जनाएको छ ।

यसैगरी सरकारी खर्चमा वैदेशिक भ्रमण नगर्न पनि संघीय सरकार, प्रदेश सरकार र स्थानीय तहलाई आयोगले निर्देशन दिएको छ । वैदेशिक भ्रमण गर्नैपरे आयोजक र प्रायोजकले खर्च व्यहोर्ने गरीमात्र वैदेशिक यात्रा गर्न आयोगको निर्देशन छ ।