संसदमा बालेन र हर्क साम्पाङको जुहारीको चर्चा

काठमाडौँ । प्रतिनिधिसभाको बैठकमा काठमाडौं महानगरपालिकाका मेयर बालेन्द्र शाह र धरान उपमहानगरपालिकाका मेयर हर्क साङ्पाङबीच सामाजिक सञ्जालमा चलेको जुहारीको चर्चा भएको छ । 

बिहीबारको बैठकमा नेकपा एमालेका सांसद कृष्णकुमार संसदमाराईले सम्बन्धित मन्त्री र काठमाडौंँ महानगरका मेयरले लाचारी ब्यक्त गरिरहेका बेलामा धरानका मेयरले म आएपछि फोहोरको समस्या समाधान हुने भयो भनेर घोषणा गरेको बताएका हुन् । 

‘‘यो विषयमा बालेन र हर्कजीको फेसबुकमा जुहारी परेको नै देखियो । यहाँ कुरा के हो भने ४ बुँदे सहमतिपछि पनि यहाँ फोहोर नउठ्ने समस्या देखिएको छ किनभने त्यहाँको जनताको समस्यालाई नजरअन्दाज गरेको देखियो ।’ उनले भने, ‘विचारणीय कुरा के छ भने न महानगरले योजना प्रस्तुत गरेको देखिन्छ न सरकारले गरेको देखिन्छ । जनतामा अन्योलको स्थिति देखियो ।’ 

मेयर सम्पाङले बुधबार साँझ सामाजिक सञ्जालमा लेखे ‘जस्ले जे भनोस् तर म काठ्माण्डौँ नगएको भए फोहोर उठ्ने थिएन रैछ ! कम्से कम काम त शुरु गरे !’  त्यसपछि उनकै स्टाटसमा मेयर बालेनले प्रतिक्रिया दिँदै लेखेका थिए - ‘हो नि … तपाईकै लौरो चुनाव चिह्न लिएर मैले चुनाव पनि त जितेको हो नि !’