दमौलीमा भेटिए डेङ्गुका सात बिरामी

काठमाडौं । तनहुँको सदरमुकामस्थित दमौली अस्पतालमा सात जनामा डेङ्गु भेटिएको छ । 

अस्पतालमा उपचारमा आएका बिरामीमध्ये स्वास्थ्य परीक्षणका क्रममा डेङ्गुका बिरामी भेटिएको हो ।  पछिल्लो समय सङ्क्रमणजन्य बिरामीको चाप बढिरहेको बेला डेङ्गुका बिरामी पनि देखिएको दमौली अस्पतालका एमडिजिपी डा राजु रानाले बताए ।  

उनका अनुसार दमौली अस्पतालमा दैनिक दुई सय भन्दा बढी बिरामी विभिन्न समस्याको लागि उपचारको लागि आउने गरेका छन् । अस्पतालमा पछिल्लो समय ज्वरो, टाईफाइड, निमोनिया लगायतका बिरामी अत्यधिक मात्रमा रहेका छन् । 

बिहीबार इमर्जेन्सीमा चार जना र ओपिडीमा तीन जना डेङ्गुका बिरामी भेटिएको उनले जानकारी दिए । एक सय डिग्रीभन्दा बढी ज्वरो आउने, आँखाको गेडी दुख्ने, खान मन नलाग्ने, वाकवाकी लाग्ने, कमजोरी हुने डेङ्गुको मुख्य लक्षण हुने डाक्टर रानाले बताए ।