नेप्सेमा ३७ अंकको गिरावट, एक अर्ब ६५ करोडको कारोबार

काठमाडौं । बिहीबार पनि नेप्सेमा ३७ अंकमाथिको गिरावट आएको छ । अघिल्लो दिन ३१ अंकले घटेर २२ सय ७५ अंकमा झरेको नेप्से सूचक बिहीबार थप ३७.०६ अंकले घट्दै २२ सय ३८.६२ अंकमा झरेको हो ।

नेपाल स्टक एक्सचेन्जका अनुसार ३७ अंक माथिले घटेको बजारमा आज एक अर्ब ६५ करोड ४५ लाख रुपैयाँ बराबरको मात्र कारोबार भएको छ । साताको अन्तिम कारोबार दिन समेत रहेको यसदिन १३ वटै उपसूचक ऋणात्मक हुँदै बजार नै राताम्मे भएको छ । 

यसदिन सबैभन्दा बढी फाइनान्स समूहको उपसूचक २.९३ प्रतिशतले घटेको छ भने हाइड्रोपावर समूहको उपसूचक २.६५ प्रतिशतले, निर्जीवन बीमा समूहको २.५८ प्रतिशतले, ट्रेडिङ समूह २.३९ प्रतिशतले, डेभलपमेन्ट बैंक २.२६ प्रतिशतले र होटल तथा पर्यटन समूह २.०१ प्रतिशतले घटेको छ । 

यस्तै, माइक्रोफाइनान्स समूह १.५८ प्रतिशतले घटेको बजारमा आज अन्य समूह १.१८ प्रतिशतले, म्यानु एण्ड प्रो १.०५ प्रतिशतले र बैंकिङ समूह १.०३ प्रतिशतले घटेको नेपाल स्टक एक्सचेन्ज (नेप्से) ले जनाएको छ । जाल्पा लघुवित्तको सेयर मूल्यमा आजपनि सकारात्मक सर्किट लागेको छ भने एभरेष्ट इन्स्योरेन्सको प्रमोटर सेयर मूल्यमा ७.१३ प्रतिशतको गिरावट आएको छ ।