बाघको टाउको चोर्ने दुई जना समातिए

सफल खबर संवाददाता

विहीबार, ०६ माघ २०७८, १८ : ०८
बाघको टाउको चोर्ने दुई जना समातिए

काठमाडौँ । राणाकालीन भवन केशरमहलबाट पुरातात्विक महत्वका दुईवटा तरबार र बाघको टाउको चोरीमा संलग्न दुईजना समातिएका छन् ।

केशरमहलबाट पुरातात्विक महत्वका सामग्री चोरेको अभियोगमा प्रहरीले त्यहीँ कार्यरत दुई जनालाई समातेको हो । पक्राउ पर्नेमा दाङको तुलसीपुर उपमहानगरपालिका–३ का सुमन शर्मा र रुकुम पश्चिमको मुसिकोट नगरपालिका–११ वीरबहादुर सुनार रहेका हुन् । चोरीमा संलग्न थप दुई जनाको पनि खोजी भइरहेको छ । उनीहरु गणेश श्रीपाली भन्ने गणेश विश्वकर्मा र देवेन्द्र केसी हुन् ।

महानगरीय प्रहरी अपराध महाशाखाका अनुसार उक्त चोरी प्रकरण गत सोमबार मात्र बाहिर आएको हो । अपराध महाशाखाको टोलीले दुई जनालाई पक्राउ गरी थप अनुसन्धानको लागि महानगरीय प्रहरी वृत्त, दरबारमार्ग पठाएको छ । उनीहरुले केशर पुस्तकालयको ठूलो कोठामा राखिएका ती सामग्री चोरेका थिए । उनीहरुले पुरातात्विक र महत्वका ती सामान बोरामा राखेर फालेको अवस्थामा प्रहरीले बरामद गरेको हो ।